Nunani Avannarlerni Piorsarsimassutsikkut Attaveqaat Nordisk Ministerrådip ataaniittoq

OM NAPA_Mads Phil_pages

NAPA tassaavoq Nunani Avannarlerniit Nunatta piorsarsimassusianut naggorissumut isaariaq. Taamatuttaaq NAPA tassaavoq kalaallit piorsarsimassutsinik aallussisut Nunanut Avannarlernut taakkulu iluanni attaveqaatinut periarfissanullu amerlaqisunut ikaartarfiat.

NAPA-p suliassaraa inuiaat kalaallit akornanni piorsarsimassuseq eqqarsaatigalugu ineriartortitseqataanissaq, tapersersuinissaq kaammattuinissarlu, pingaartumik meeqqat inuusuttullu akornanni piorsarsimassutsip iluani sullissinermi. NAPA-mittaaq nunatsinni nunanilu allani attuumassutilinnik suleqateqarnissamik ammaasuusarpoq, attaveqaqatigiinneq eqqarsaatigalugu suleqatitullu.

NAPA Nunani Avannarlerni aningaasanik qinnuteqarfiusinnaasunik ilisimatitsisarpoq, soorlu Kultur Kontakt Nord, Nordisk Kulturfond aamma NordPlus.

NAPA-p immikkut pingaartarai makku:

Meeqqat inuusuttullu

Nunani Avannarlerni oqaatsit

Assigiinngiiaartuussuseq

Piorsarsimassutsikkut kingornuttakkat

Inuuniutigalugu, saniatigooralugu kajumissutsiminnillu aallutaqartunut tapiisarpugut. NAPA-mut aningaasaliissutaasartut ilaat nammineq suliniutigisanut atortarpagut, tassungattaaq atatillugu allanik suleqateqarnissamut nutaanillu aallutaqarnissamut soqutiginnittuusarpugut.

NAPA-p immikkoortortaqarfiit sammisaminut assingusut makku suleqatigai, Nordens Hus Savalimmiuniittoq, Nordens Institut Ålandimiittoq, Nordens Hus Reykjavikimittoq aamma sammisatsinnut attuumassuteqartartut ukuusut: Nordatlantens Brygge Københavnimiittoq aammalu Nordatlantisk Hus Odensemiittoq. Aammattaaq NAPA-mi pilersaarpugut nunat baltsiskiusut annertunerusumik suleqatigissallugit, taamatullu kititsinni qanigisagut Canada Alaskalu.

NAPAp piorsarsimassutsikkut aningaasakkut tapiisarneri inuinnarnut, peqatigiiffinnut aamma suliffeqarfinnut qinnutigineqarsinnaapput. Qinnuteqaalli NAPAp pingaartitaanut tunngaveqartariaqarpoq, soorlu qulaani taaneqartutut. Qinnuteqaat uani nittartakkami nassaarisinnaavat.

Nuummi Kulturip Illorsuaani Katuami allaffeqarpugut, ulluinnarnilu 09:00-imiit 16:00-imut ammasarluta. Maani aningaasaateqarfiit nunani avannerlerneertut qinnuteqarfiginissaannut ikiorsarneqarsinnaavutit, piorsarsimassutsikkullu Kalaallit Nunaanni suliat pillugit ilisimasarsiorsinnaallutit – pulaarusukkuillu matu ammajuaannarpoq kaffeqartuaannarluilu. Aamma Facebook-imiippugut: Nordens Institut i Grønland

Kikkut tamarmik tikilluaqqusaajuaannarput!

Assiliisoq: Mads Pihl / VisitGreenland