(N)ORD NAPA-p Nunani Avannarlerni oqaatsit pillugit nammineq podcastiliaraa, tassani nunat avannarliit kulturillu akornanni oqaatsit atorneqartut pillugit paasisaqassaagut, misissuillutalu.  

Nunani Avannarlerni inuit katillugit 27 millionit najugaqarput, tamarmillu oqaatsit assigiinngitsut arfineq pingasut inuiaqatigiinni atorneqartut oqaaseraat. Ilaasa nunani avannarlerni oqaatsit ataatsit oqalussinnaavaat, allallu arlallit oqalussinnaallugit, kisianni nunani avannarlerni innuttaasut amerlanerit immitsinnut paasisinnaanerput ataatsimoorussutigaarput.  (N)ORD-imi Nunani Avannarlerni oqaatsinik atuisuusut, oqaatsinik nuannarisaqartut oqaatsillu pillugit illisimatuut naapittarlugit angalaassaagut.  Nunani avannarlernit arlalinnit ingerlaavartumik nunani avannarlerni oqaatsinik atuisorpassuit pillugit immiussissaagut. 

Podcastimi nunani avannarlerni oqaatsit nipillu tusarnaarneqarumaartut kissaatigaarput, nunanilu avannarlerni inuit oqaatsit ilisimasaqarfiginngisamik tusarnaarnissaannut qunusuinnerulernissaat kissaatigalugu. Taamaattumik podcasti skandinaviskisut oqaasertaqarpoq - tassa danskisut, svenskisut norskisullu. 

NAPA sinnerlugu suliarinnittuupput Malin Corlin aamma Per Bloch
Speak & manuskript Malin Corlin
Jingle aamma qiortarnera Per Bloch
Mastering Mikkel Gemzøe/Varibeat
Assiliamik ilisarnaasiortoq Brasse Grafisk Design


(N)ORD ukunani nassaarineqarsinnaavoq
Apple Podcast 
Spotify 
Soundcloud 

Immikkoortoq 1: Oqaatsit ilitsoqqussat puigorneqarsinnaappat?

(N)ORD-imi immikkoortumi siullermi oqaatsit ilitsoqqussaralugu oqaaserisat saniatigut nunani avannarlerni oqaatsinik allanik ilinniarneq sammineqarpoq. Oqaatsit ilitsoqqussat ulluinnarni atortanngikkaanni qanoq puigunnginnissaat ajornakusoorsinnaatigisoq eqqartorneqassaaq. Aamma nammineq oqaaserisat ilitsoqqussat atorlugit oqalunniarneq ajornakusuuleraangat misigissutsit qanoq ittut misigilertarneri sammineqarpoq. 

Aallakaatitami finlandimiu Pauliina svenskisut, islandimiutut, savalimmiormiutut qallunaatullu oqaatsinik ilinniarsimasoq, maannalu finlandimiusut oqaatsiminik attassiinnarnissaminik unammilleqqasoq aamma naapissavarput. 

Kalaaleq Sverigemi najugalik Ivalu naapissavarput, taassuma kalaallisut oqaatsini arriitsumik puigoriartorini misigaa, kisianniligooq puigoraluarunigit annaasaqarsimasutut misiginavianngilaq. Maannakkuugallartoq taama misigisimavoq.

Aamma islandimiu Lena, ukiut 13-it Islandi qimaqqareerlugu "inersimasutut" islandimiusut oqaaseqarani misigisimasoq naapissavarput.  

Akissut ujartugarput tassaavoq: Oqaatsit ilitsoqqussat puigorneqarsinnaappat?