Sermip Kunngiata Pania Imm. II – kulturikkut kingornussarsianik piujuaannartitsinermik tunngavilik

21. January 2017

Sermip Kunngiata Pania Imm. II – kulturikkut kingornussarsianik piujuaannartitsinermik tunngavilimmi siunertaavoq, atisanik nutaalianik ilusilersuisartoq isumassarsititaagaangat susoqartarneranik paasiniaaneq. Inuiaqatigiit isumassarsivigisai qanoq sunnerneqassappat, isumassarsiallu saqqummiunneqarnerat sussappat?

Inuiaqatigiit suulluunniit kulturikkut oqaluttuarisaanerat ineriartortuaannartuuvoq. Inuiaqatigiinnilu mikinerni soorlu nunatsinni, ineriartorneq nutaaliornikkut ersersinneqarnissaa nunap avataanut apuuttussamik, nunarsuarmut oqaloqatiserinnippalaartumik ingerlanneqarnissaa pingaaruteqarpoq.

1998-mi atisanik ilusilersuisartoq qallunaaq Jørgen Simonsen atisanik nutaalianik ilusilersuisarfimmi Versacemi piukkunneqarluni pisortanngortinneqarpoq, aallarniisup Gianni Versacep alianartumik toqunerata kingorna. Atorfinitsitsinissamut oqaloqatigiinnerni siullerni Jørgen Simonsenip atisat katersat ilusilersorsimasani Sermip Kunngiata Pania taaguutilik saqqummiuppaa. Atisat katersat taakku kalaallit inuit kulturiat – annermik kalaallisuut – motorcykelertartullu kulturiat isumassarsiorfigalugit ilusilersorsimavai. Atisat saqqummiussai nuannarineqarluarput, taamaalillunilu aallarniisup Aterlier Versacep toqunerata kingorna siullermeerluni atisanik katersanik saqqummersitseqqippoq.

Jørgen Simonsen nunatsinniinnikuunngisaannarsimavoq, atisallu katersat 1998-mi nunarsuaq tamakkerlugu tusagassiuutitigut saqqummermata kikkunit tamanit nuannarineqarput. Ukiullu qulit kingorna 2010-mi atisanik nutaalianik ilusilersuisartoq qallunaaq, Peter Jensen, atisat katersat ’Jytte’ saqqummersippai, aammattaaq kalaallisuunit isumassarsiorfigineqarsimasut. Assigiinngitsunik ilassineqarpoq: Peterp ilusilersuigai kamippaat takisuut – kitaani arnat kamiinit isumassarsiorfigineqarsimasut – nunatsinni annertuumik isornartorsiorneqarput, ilaatigut qinngarinnittunik e-mailikkut allattoqarluni, allaallu toqutsinissamut siorasaarisoqarluni. Allaniilli atisat katersat tigulluarneqarput, nunallu tamalaat akornanni nutaalianik atisanik ilusilersuisartunit kalaallisuut kusanaqisut maluginiarneqartalersimanerat nuannaarutigineqarluni.

Aallartinnera
Ukioq manna junimi suliniut pingaartumik aallartisarneqarpoq, Jørgen pisimasunik tunngavilinnik filmiliortartoq Niklas peqatigalugu, siullermeerluni nunatsinnut tikeraarmat, Nuummut, Sisimiunut Kangerlussuarmullu. Angalanermi mersortarfik Kittat Nuummiittoq aammalu Kalaallisuuliornermik Ilinniarfik Sisimiuniittoq suleqatigalugit aallartipput. Tassani Jørgen siullermeerluni nammineq isigalugit nunarput kulturialu isumassarsiorfigai. Aamma Nuummi Sisimiunilu ilusilersuisartunut inuusuttunut ilinniartunullu workshopertitsivoq, isumassarsiami titartarnera inunnullu amerlasuunut siammarternera pillugu.

Suleqatigiinneq
NAPA – Nunani Avannarlerni Piorsarsimassutsikkut Attaveqaat, Kittat, Kalaallisuuliornermik Ilinniarfik Sisimiuniittoq Nunattalu Katersugaasivia peqatigalugit Jørgen suleqatigalugu aallartipput, suleqatigiinnermilu Sermip Kunngiata Paniani titartakkat originalit najoqqutaralugit titartakkat tarratut ersittut nutaat tallimat titartassallugit. Jørgen ilusilersuisuussaaq, Kittallu Sisimiunilu Kalaallisuuliornermik Ilinniarfik suleqatiginerisigut kalaallisuup ilaa sananeqassalluni. Great Greenland puisip amiinik tapersiissaaq, tarratut ersittut nutaat tallimat annermik puisip amiinik sanaajussallutik.

Kalaallit Nunaanni Unnuk Kulturisiorfik 2017-mi Sermip Kunngiata Paniani titartakkat originalit, Versacep atisanik takutitsineraniit assit aammalu tarratut ersittut nutaat tallimat saqqummersissavagut. Suliap ingerlanera pillugu filmimik takutitsissaagut, ilisimasalinnillu oqallitsitsissalluta. Oqallinnermi suliniummut ajornartorsiummullu isummat assigiinngitsut tamaasa inissaqartinneqassapput. Nunatta Katersugaasivia toqqarneqarpoq, sammisamut tassa Jørgenip isumassarsiorfigisaanut ilaatigut kalaallisuumut attuumassuteqarmat. Saqqummersitsinermut paasisimasalinnillu oqallitsitsinermut atatillugu filmi suliniummut tunngasoq Sverigemiu assiliisartumit Nicklas Croallimit sananeqartoq saqqummiutissavarput. Filmimi Sermip Kunngiata Pania Imm. II – kulturikkut kingornussarsianik piujuaannartitsinermik tunngaviliup suliarineqarnerani nunatsinni kulturitoqqap silarsuarlu nutaaliaq avataanersup akornanni oqaloqatigiinnerit naapeqatigiinnerillu immikkuullarissumik takutinneqarput.

Suliniummut tapiissuteqartut ukuupput: Kulturkontakt Nord, Tapiissuteqartarfik Sermeq, NAPA – Nunani Avannarlerni Piorsarsimassutsikkut Attaveqaat, Royal Arctic Line, Visit Greenland, Julemærkefonden, Great Greenland, Hotel Arctic, World of Greenland, Ittu.net, Namminersorlutik Oqartussat tips-ernermiit lotto-rnermiillu aningaasaniit aningaasaateqarfiat, Namminersorlutik Oqartussat kultureqarnermut aningaasaliissutaat aamma Nordisk Kulturfond.

Videoliaq uani takuuk.

Udstillingskatalog Iskrystalprinsessen

Suliamik aqutsisoq : Katja Vahl / katja@napa.gl 

Aamma atuaruk:
Versacemut atisat ilusilersukkani pillugit Jørgen Arnanut-imi apersorneqarnera: Jørgen Simonsen i Arnanut 51