Ordskælv

3. December 2016

Nunani Avannarlerni suliniummut atatillugu piitsuussuseq pillugu inuusuttut allaaserisaqarput

Ordskælv – oqaatsit atorlugit sajuppillatsitsineq –  nunat avannarlermioqatigiit suliniutigivaat, inuusuttut atugarliortut piitsuussuseq pillugu allaaserinnittarfigisaat. Atuakkiortunngorniat nunatsinneersut sisamat peqataapput.

Nunatsinni Oqaatsit atorlugit sajuppillatsitsineq – Ordskælv – novembari 2015-imi aallarnisarneqarmat nunat avannarlerni nunat arfineq pingasut tamarmik (Norge, Sverige, Qallunaat Nunaat, Finland, Island, Kalaallit Nunaat, Savalimmiut kiisalu Åland) tamarmik immikkut oqaatsit atorlugit sajuppillatsitsiffiupput. Suliniummullu matumunnga NAPA Nunatsinniittoq suliarinnittuulluni.

– Piitsuussusermut tunngatillugu immikkoortitaaneq oqaasinngortinnissa suliniutip siunertarivaa. Kulturerisarlu atorlugu oqaaseqaraanni oqalliffeqarlunilu, taava tamat oqaaseqarsinnaatitaanerannut sammilluinnarpoq: Kiammi nipaa tusaaneqassava, kiallu piviusorsiornera nassuiarneqassava? Taamaammat suliniut Oqaatsit Atorlugit Sajuppillatsitsineq una NAPA-mut Kalaallit Nunaannillu ilaaffigissallugu tulluartuuvoq, NAPA-mi pisortaq Mats Bjerde oqarpoq.

Periusissartaa

Suliniutip periusissartaani qallunaat suliniutaat ”Hyggefactory”, arlalinnik naammasseriigaqartuusoq, aallaavigineqarpoq. Suliniutigisartagaanni inuusuttut sapinngisartik tamaat atorlugu misigisatik sakkortuut pillugit nassaarsiullaqqippalaarlutik oqaasinnguisalernissaat siunertarineqarpoq.

– NAPA qanimut suleqatigalugu Nunatta Atuagaateqarfia, Angerlarsimaffik AJA, Kalaallit Atuakkiortut aamma MIO-meersut peqatigalugit suliniut aqunneqarpoq, taakkulu suleqatigalugit inuusuttut sapiitsut sisamat nassaarisinnaasimavakka, oqaluttuanik sisamanik assigiinngeqisunik allaaserinnissimasut, allaasserisimasaat ilaatigut immikkoortitaanermik piitsuussusermillu imaqarput, Nina Paninnguaq Skydsbjerg Jacobsen, NAPA-p suliniutigisaani aqutsisuusoq oqarpoq imalu nangilluni:
– Suliniutip ingerlanneqarnerani Sørine Steenholdt inuusuttunut siunnersuisartutut ingerlajuarsimavoq, inuusuttullu oqaluttuassamik kimingata suuneranik nassaarniarneranni ikiuuttuarsimalluni.

Nunatsinnit peqataasussat sisamaasut oqaluttualiaat maanna nutsigassanngortinneqalereersut aqqi tassaapput:

•      Aputsiaq Brandt
•      Justus Larsen
•      Manumina Jensen Poulsen
•      Paninnguaq Heilmann

Ingerlanissaa

Suliniutip ingerlanerani peqataasut nunatsinneersut marloriarlutik nunatsinni workshopertinneqarnerini oqaluttualiornissaminnut sakkussanik tunineqarput. Naggataarutaasumillu Biskops Arnö-mi Sverigemiittumi workshopertitsisoqarmat atuakkiortoqatitik nunat avannarlerneersut tamaasa naapippaat, oqaluttuatillu amerlanerpaat tassani naammassillugit. Oqaatsit Atorlugit Sajuppillatsitsinermi – Ordskælvimi – nammineq oqaatsit atorlugit oqaluttualiat allanneqarput, tamatumalu saniatigut tuluttuumut nutserneqartussanngorlutik.

– Suliniutip ingerlanera malinnaavigalugu isumassarsinarluinnarpoq, taakkumi piffissaq annertooq nukipparujussuillu atorlugit sapiissuseqarniarsaralutillu oqaluttuassaminnik allanut tusartikkumasaminnik allaaserisaqarput. Oqaluttuarisaallumi sakkortoqaat. Piitsuussuseq oqaluuserineqassalluni paqumigineqartarmat ajornartorsiutip suunera pillugu suliniutitsinni oqaasinnguititsiniarsarisimavugut. Piitsuussusermi aningaasassaaleqinerinnarmik aallaaveqarneq ajorpoq, kiserliornermi aamma misigissutsikkut piitsuussusiusinnaasoq, atuakkiortunngorlaat ilaata allaaseraa, Nina oqarpoq.

Suleqatigiinneq

Nunatsinni Oqaatsit Atorlugit Sajuppillatsitsineq – Ordskælv i Grønland – ukunannga aningaasaliiffigineqarpoq: NAPA, Namminersorlutik Oqartussat Tips aamma Lottomiit aningaasaateqarfianit, aningaasaateqarfik Sermeq Fonden aamma NunaFonden.

Inuusuttut pineqartut workshoppertitsinerni ilinniartinneqarput, kaammattorneqarlutik sakkussaannillu tuniorarneqarlutik, ilaatigullu atuakkiortoq islandimiuusoq Thorarinn Leifsson, nunatsinni erinarsortartoq ilinniartitsisorlu Nina K. Jørgensen, atuakkiortoq Niviaq Korneliussen, Teambuilderitut ilisimasaqarluartoq Lasse Nymand Petersen aamma namminersortoq suliffeqarfiutilik tusagassiortorlu Maren Louise Poulsen Kristensen oqallissaarusiortuullutik.

Aamma inuusuttut oqaluttualiaat atuaganngorlutik saqqummerpata tamarmik eqqumiitsuliortunit nunatsinneersunit assiliartalersorneqassapput, taakkulu suliniummut atatillugu eqqumiitsuliatik akeqanngitsumik tunissutigisimavaat. Eqqumiitsuliortut tassapput: Julie Edel Hardenberg, Bolatta Silis Høegh, Sissi Møller aamma Gukki Nuka Wilsen Møller.

Saqqummersinneqarnissaa

Oqaluttualiat tamarmik oqaluttuaannaagaluartut inuusuttut inuunerminni misigivittarsimasaannik aallaaveqarput. Inuusuttut Nunat Avannarliit atuakkiortitaasa allagaat tamarmik immikkut atuaganngorlugit novembarip qaammataani saqqummiussuunneqalissapput, nunat tamarmik immikkut atuakkiortinneqassallutik oqaatsillu atukkat saniatigut tuluttuumut nutserneqartussaassallutik. Atuakkat Finlandimi saqqummersinneqarnialerpata peqataasut tamarmik najuutissapput. Kalaallit inuusuttaasa atuakkiaat NAPAp aaqqissuussaannik nunatsinni decembarimi sap.ak. siulleq naappat saqqummersitsinersiorneqassaaq.
Paasissutissanik annertunernik piumagaanni attavissaq:

Suliniummut aqutsisoq Nina Paninnguaq Skydsbjerg Jacobsen: paninoir@gmail.com imaluunniit (+299) 54 87 85