Norden 2040

10. September 2015

Siunissamut takorluugaq
-’Norden 2040’ Nunani Avannarlerni allannermut naapeqatigiinneq

Septembarip 10-ianiik 14-ianut kalaallit inuusuttut atuakkiornermut allannermullu soqutigisallit arfineq pingasut Islandimut workshop-imut peqataajartorlutik aallassapput. Workshop-i ateqartoq, Norden 2040, Islandimiik, Savalimmiuniik, Ålandimiik Kalaallit Nunaanniillu inuusuttunik peqataaffigineqassaaq, sammissuaallu nunani avannarlerni siunissarput.

– Nutaajunerusoq, ullutsinnullu tulluunnerusoq – nunatsinni sungiusimasatsinniik allaanerusoq, oqarpoq Nuummeersoq Islandimilu peqataasussaq Maasi Brøns Chemnitz, neriupporlu Islandimi workshop-erneq nunatsinni atuakkiornerup siuarsarneranut iluaqutaajumaartoq.

Inuusuttut atuakkiornermut soqutigisallit katillugit 26-it peqataassapput, workshop-illu saniatigut International Litteratur Festival Reykjavik-imi ingerlanneqassammat peqataasut periarfissaqassapput festivalimi ilaanissamut. Inuusuttut nunani avannarlerni siunissarput pillugu allaaserinnissapput nittartagakkut ’Medium’-ikkut saqqummertussanik. Taamaasilluni politikerit, aqutsisut inuiaqatigiinnilu malinnaasut periarfissinneqassapput qanoq inuusuttut nunani avannarlerni avinngarusimanerusuneersut siunissamut qanoq takorluugaqarnersut atuassallugu.

– Pissanganarpoq nunani assigiinngitsuni sisamaninngaanneersut naapissallugit. Pissaganarporlu inuusuttoqatitta nunat avannarlerni siunissatsinnut takorluugaat tusaassallugit paasisaqarfigissallugillu, taamatut oqarpoq Maasi.

Maasi qaaqqusallu allat atuakkiortut nunarsuarmi tamarmeersut naapeqatigiiffiannut International Litteratur Festivalimut peqataassapput, assersuutigalugu atuakkianik allatanillu atuaanerni. Taassuma saniatigut ilinniartitsisut saqqummiisussallu naapeqatigiinnermut qaaqqusaanikuupput.

– Oqaasinngortitsisinnaaneq atuakkiortullu nammineq eqqarsaatiminut tiguaasinnaanera eqqumiitsuliornermut tunngaannanngilaq – aamma oqartussaaqataanermut tunngavoq. Norden 2040 nunani avannarlerni suleqatigiinneruvoq piviusunut tunngalluartoq, NAPA-mi pisortaq Norden 2040-millu aallarniisoq Mats Bjerde oqarpoq.

Norden 2040 oqaluttualiornermik unammisitsinermut Allatta 2040-mut attuumassuteqarpoq, taamaattumillu Allatta 2040-mi atuakkiortut ajugaasuni qulini arfineq pingasut Islandimut ilaassapput. Inuusuttut allannikkut atuakkiornikkullu nunani avannarlerni inuusuttoqatitik peqatigalugit siunissarput allaaserissavaat.

Workshop-ertitsineq NAPA Nunat Avannarlerni Piorsarsimassutsikkut Attaveqaatip aaqqissugaraa, taassumalu saniatigut Ålandimi Nordens Institut, Islandimi Nordens Hus, Savalimmiuni Nordens Hus, Nordisk Kulturfond, NORDBUK aamma Vestnordisk Hovedstadsfond tapiisuupput.

Eqqaaneqareersutut workshop-ertoqarnerani allanneqartut nittartagakkut atuarneqarsinnaanngussapput – uani atuarsinnaavatit: ‘Medium’.

Islandimi workshop-ertoqarnerani pisussat allattorsimaffiat dansk-isoortoq uani aaneqarsinnaavoq: Program Norden 2040 i Reykjavik

Attavissat:

Maasi Brøns Chemnitz, Kalaallit Nunaanniit peqataatitaq: maasichemnitz@hotmail.com

Inuuteq Kriegel, attaveqarnikkut NAPA-mi praktikkertoq: inuuteq@napa.gl telefon: 36 36 65
Katja Vahl, Norden 2040-mi aqutsisoq, NAPA: katja@napa.gl mobil: 589259