Location Greenland 2.0

23. September 2016

Kangerlussuarmi nunat tamalaaneersut filmiliornermik suliallit naapinnerat

Filmiliornermik suliallit nunatsinneersut nunattalu avataaneersut 23./24. september naapissapput nunatsinni filmiliornerup ineriartortinnissaanut alloriaqqinniarlutik.

Aaqqissugaq Kangerlussuarmi ingerlanneqartussaq ateqarpoq »Location Greenland 2.0«, tassanilu filmiliornermik suliallit USA-meersut, Norgemeersut, Sverigemeersut, Danmarkimeersut nunatsinneersullu katersuutissallutik. Filmiliornermik suliallit nunatsinneersut nunattalu avataaneersut akornanni attaveqaqatigiinnerup annertusarnissaa siunertaavoq. Taamaalillutik filmiliornermik suliallit nunatsinneersut nunani allani filmiliornernut suleqataasinnaalissapput piginnaaneqarnerulerlutillu. Filmiliornissamut tunngatillugu Kangerlussuarmi suliallit misilittagaat inerisaqqinnissai aamma siunertaavoq.

”Kalaallit Nunaat tunuliaqutarissallugu immikkuullarissuullunilu alutornaqaaq”

Uani ilaatigut filmiliornermi ingerlatsisoq amerikarmiu David Casey annertuumik sunniuteqaqataavoq. Nunatsinni arlalinnik filmiliortarsimavoq: ”Kalaallit Nunaat filmioliortarfinni nuannarineqarnerpaat ilagilersinnaavai. Kangerlussuarmi ineriartortitsinissamut periarfissat amerlaqaat, pinngortitarsuaq filmiliorfigissallugu alutornartoq peqqutigalugu. ” Casey nangippoq: ”Kalaallit Nunaanni filminik TV-kkullu aallakaatitassianik filmiliorneq suliaavoq annertoorujussuaq, iluatsissagaannilu inuppassuit piginnaanillit pisariaqartinneqarput. Nunarsuarmi oqaluttuat sakkortunerpaat uppernarnerpaallu filmiliarineranni Kalaallit Nunaat tunuliaqutarissallugu immikkuullarissuunera tupinnaannarneralu FILM.GL-ip maanna ingerlataata takutissavaa. Suliniummut pingaarutilimmut peqataanera ataqqineqaatigeqaara.”

Ukioq manna ataatsimersuarneq FILM.GL-imit aammaarluni aaqqissuunneqarpoq. FILM.GL tassaavoq nunatsinni filmiliornermik suliaqartunut peqatigiiffik. Ukioq manna ataatsimersuarnermi Kalaallit Nunaat filmiliorfittut atorneqartalernissaa sammineqarpoq. Ullumikkut issittumi filmiliorniartut Island imaluunniit Norgep Avannaani filmiliortarput. Kalaallit Nunaalli Kangerlussuarlu amerlasuunik neqeroorutissaqarpoq, Kangerlussuarmi nuna allanngorartuugami sumiiffiillu akornanni aqqusineqarluni. Island pingaarnertut isumassarsiorfigineqarpoq. Ukiuni kingullerni qulini Island ineriartorsimavoq, nunat tamalaaneersunut filmiliortunut sumiiffittut atorneqarnera annertuserujussuarluni. Ineriartorneq aningaasaqarnikkut annertuumik iluaqutaanerata saniatigut, islandermiunut filmiliornermik sulialinnut annertuumik ineriartortuutaasimavoq, nunat tamalaat akornanni pitsaassutsimut naammassinnissinnaanngorlugit.

Takuss’

Filmiliornermik suliallit nunatsinneersut nunattalu avataaneersut workshopini eqqartussavaat, qanoq nunatsinneersut nunani allani filmiliornernut peqataanissaat qulakkeerneqassanersoq. Soorunami aamma peqataasut nunarput filmiliorfittut immikkuullarissutut periarfissai namminneq misigissavaat.

Uku suleqatiginerisigut aaqqissuussineq piviusunngortinneqarpoq: Namminersorlutik Oqartussat, NAPA, Nuna Fondi, Visit Greenland, Air Greenland aammalu World of Greenland Arctic Circle. Paasisaqarneruniaruit attavigiuk: Ulrik Bang, ulrik@bang.gl, +299 59 12 82.