AWG 2016

7. March 2016

2006-mili Arctic Winter Gamesip nalaani nalliuttorsiornermi kulturikkut isiginnaartitsinernut kalaallit sinnerlugit NAPA tunniussisarsimavoq. Nalliuttorsiornermi kulturikkut isiginnaartitsinerit ukiut marlukkaarlugit nunat issittut qulingiliuaasut arlaanni ingerlanneqartarput. 2016-mi Arctic Winter Games Nuummi ingerlanneqarpoq.

2016 ‘Kingorna’ Nuummi isiginnaartitsissutigineqarpoq
Kristian Mølgaardip norgemiu qitittartoq, Madelaine Graadahl, aammalu kalaaleq qitittartoq, Alexander Montgomery-Andersen, suleqatigalugit musicaliliaa.
’Kingorna’-mi Maliina seqininngornerata aammalu Aningaap qaammanngornerata kingorna issittumi ukiup kaajallakkiartorneri sisamat oqaluttuarineqarput. Isiginnaartitsisartut qitittartullu inuusuttut piginnaanillit arfinillit nunatsinneersut oqaluttuaq attortinnartoq isiginnaartitsissutigaat. Isiginnaartitsiviup kiluanik aaqqissuisuuvoq eqqumiitsuliortoq kalaaleq, Lisbeth Poulsen. Qullilerivoq Naleraq Eugenius, Qillaq Berthelsenilu nipileraluni. Kingorna pillugu quppersagaq takuuk.
Asseq: Angu Motzfeldt.

AWG2016_text

 

2014 ‘Flying Drops’ ´Fairbanks, Alaskami isiginnaartitsissutigineqarpoq
Musicali Pipaluk Kreutzmann-Jørgensenip erinarsortartut Aviaja Lumholdt, Karina Møller aamma Kimmernaq Kjeldsen peqatigalugit suliaa. Erinarsortartut qitittartullu inuusuttut arfinillit inuit inuusuttut nunarsuarmi angalallutik issittumi qalipaatit pillugit paasisassarsiornerat pillugu oqaluttuarput. Filmi qulleq tassaavoq niviarsiaqqat Fairbanksimut angalanerat pillugu filmi, alliullunili Fairbanksimi takutitsineq tamakkiisoq. Filmit Martin Klevegårdimit, filminik ingerlatsisartoq Sverigemeersumit suliarineqarput.

 

2012 ‘My home is the home of Peace’ Whitehorse, Yukonimi isiginnaartitsissutigineqarpoq
Qitinnermik isiginnaagassiami Ruth Montgomery-Andersenimit suliarineqartumi, kalaallit inuusuttut arfinillit aalallutillu oqalullutik killisimanartumik isiginnaartitsipput. Aamma 2012-mi kulturikkut isiginnaartitsinerup nunarput Yukonilu ataqatigiilersippai, isiginnaartitsisartut inuusuttut sisamat Whitehorsemeersut isiginnaartitsinermi peqataatinneqarmata.

AWG-2012_event

 

2010 ‘A travelling song’ Grande Prairie, Alberta Canadami isiginnaartitsissutigineqarpoq
’A travelling song’-imi qitinneq, nipilersorneq oqaluttuarnerlu atorlugit isiginnaartitsisoqarpoq. Isiginnaartitsinermi inuit inuusuttunit tallimanit kulturi inuiaallu nukittuut akornanni nakuussutit, akerleriinneq pinnissuserlu nersorneqarput. Ilitsersuisoq Sydafrikamiu Gcina Mhlophe, isiginnaartitsiviup kiluanik aaqqissuisartoq norgemiu, Zoe Christensen aammalu NAPA suleqatigiillutik isiginnaartitsineq aaqqissuuppaat. Isiginnaagassiami nipit periusillu Sydafrikameersut nunatsinniillu erinarsoqatigiit oqaluttuarnerlu akulerunneqarput.

 

2008 ‘Sila’ Yellowknife, Northwest Territories Canadami isiginnaartitsissutigineqarpoq
Qitinnermik takutitsinermi Sørine Pedersenemit Aasianneersumit ilusilersorneqarpoq. Isiginnaartitsinermi atisat Lena Olsenimit sananeqarput, uaajernermilu ilitsersuisuulluni Else Danielsen. Isiginnaartitsinermi nunarput tamaat takutinneqarpoq, Nuummut, Aasianniit Qeqertarsuarmiillu qitittartunik inuusuttunik peqataasoqarluni.

 

2006 ‘Ravens Call’ Kenai Pininsula, Alaskami isiginnaartitsissutigineqarpoq
Qitinnermik takutitsineq Ruth Montgomery-Andersenimit ilusilersorneqartumi, kalaallit inuusuttut arfinillit qitillutik isiginnaartitsipput. Issittumi tulugaq kusanarlunilu ataqqinartuuvoq, tulugarlu pillugu oqaluttuatoqqat Kalaallit Nunaanni, Canadami Alaskamilu tusarsaallutik. Taamaasilluni nunat issittut ataqatigiinnerat tulukkap ersersippaa. Aammattaaq uagut nammineq siuaasagullu issittumi anigusinnaanerannut inuusinnaanerannullu assersuutaavoq.

AWG-2006_event