Siunnersuinissamut piareersimasoq

Pauliina Finlandimeersuuvoq, nunanili avannarlerni assigiinngitsuni arlalinni Islandimi Savalimmiuni Qallunaat Nunaanni Ålandimilu najugaqareersimavoq. Taassuma saniatigut aatsaat Kalaallit Nunaanni najugaqarluni siullermiilinngilaq. Ukiummi affaani 2019/2020-mi Nuummi najugaqareersimavoq. Kalaallit Nunaanni najugaqarnermini NAPA-mi sungiusarluni sulisimavoq, kulturikkut tapiissutinut sulianut aammalu sulianut allanut tapiissutinut suliaqarluni ikiuuttarsimalluni. – Oqaatsit, kulturi nunanilu avannarlerni suleqatigiinnernut tunngasut soqutigisarilluinnarpakka. Aamma nutserisutut suliaqartarpunga, atuakkiorumaarnissannillu pileriginnillunga, taama oqarpoq Pauliina. Siunnersortitut sulinermut akisussaaffik Pauliinap NAPA-mi pingaarnertut suliarai aningaasaateqarfinnut tunngassuteqartut tamaasa. NAPA-p kulturikkut tapiisarfianut tunngasut aamma Issittumi Suleqatigiinnermut Tapiissuteqartarfik suleqataaffigai. Qinnuteqartut apeqquteqaatigisaat aamma akissuteqarfigisarpai mailikkut oqarasuaatikkullu aamma siunnersortarlugit. – Siunnersuineq aamma allatigut ingerlanneqartarpoq. Alajangiineq ajorpunga, qinnuteqaatilli nalunaarusiallu atuartarpakka tamatumalu kingorna nalilersuisussanut aalajangiiffigisassanngorlugit ingerlateqqittarpakka. Aamma aningaasaqarnernut tunngasunik annikikkaluartunik suliaqartarpunga. Aammattaaq suliffeqarfiit allat sulerisarnersut malinnaavigikulasarpakka, nunani avannarlerni tapiissutit allat suut periarfissaanersut pillugit, taama oqarpoq Pauliina. Siunnersortitut inissisimaffimmini aamma attaveqaatigiinnissamut piginnaaneqarluartuusariaqarpoq, NAPA-milu aningaasaateqarfiit assigiinngitut qanoq ingerlanneqarnersut paasisimasaqarfigisariaqarlugit. – Inuit assigiinngitsut naapittartussaavakka, qinnuteqaatinillu suliarinnittariaatsip qanoq ingerlanneqartarnera tamanut paasinartumik nassuiaatigisartussaallugu. Aamma NAPA-p tapiissutit suut qanorlu ittut tapersersorusuttarnerai paasisimasaqarfigisariaqarpara. Taamaalillunga qinnuteqartunut pitsaanerusumik siunnersuisutut inissisimasinnaavunga. Suliniutit tapiissuteqarfigeqqullugit qinnuteqaatigineqartunut naliliiffigisassanngorlugit ingerlateqqittakkakka eqqortumik pisortamut oqaaseqarfiginissaanut ilisimasakka iluaqutaasussaapput. Aatsaat siullermeerlunga tamakkiisumik atorfilittut siunnersortitut atorfeqarpunga. Tunuliaqutakka innuttaasunik sullissinermiipput aammali namminersorlunga sullissisinnaanermik piginnaasaqarlunga taakkulu marluk piginnaaneqarfigalugit uani suliffimmi imminnut tulluartorujussuupput! Taama Pauliina naggasiinermini nassuiaateqarpoq. Siunnersorti oqaatsinut piginnaaneqarluartoq Pauliinap oqaatsit arlallit atussallugit piginnaaneqarluarfigai. Finlandimiusut svenskisut danskisut aammalu tuluttut oqalussinnaavoq. Aamma allaat kalaallisut oqaatsit ilinniarlugit aallartereersimavoq. Oqaatsinut ilikkarusussuseqarnera gymnasiarnerata nalaanili aallartissimavoq  ilinniarnertuunngorniarnermini nunat avannarlermiut pillugit sammisaqartarsimagamik. – Svenskisut ilikkarluaruma norskit danskillu oqaasii, immaqalu aallaat islandimiut savalimmiormiut oqaasii ilanngullugit paasisinnaallugit paasivara. Ilaa tamanna torralluinnarpoq! Tamatuma kingorna nunani avannarlerni arlalinni najugaqarsimavunga, taamalu nunami oqaatsit  ilikkarsinnaanerlugit misilittarsimavara. Iluatsilluarsimavorlu. Kalaallilli oqaasii oqaatsit nagguii eqqarsaatigalugit allaalluinnartumik inissisimasuupput uannullu ilikkassallugit ajornarnerulaarput. Kisianni! Inunnguuseralu oqaaserisama oqaasilerinertaa pillugu iluaqusersorluarpaannga! Taama Pauliina naggasiilluni oqaaseqarpoq.